Pour-Eux.com, Votre Communauté

Fable Picarde...
(cette blague est en CH'TIMI)

Lès biètes malâdes d’eùl pèsse...


In mô qu’ on d’ a peûr come du leû,
Mô quë l’ cièl, quand il eùt furieûs,
A fét come punission pou lès sot’rîes dë l’ têre,
Eùl pèsse (pwisqu’ i fôt bieu eùl loumeu pa s’ vré nom),
Qu’ i n’ li fôt foc’ in joûr pou répli l’ Akèron,
À lès pôves biètes avwat fét l’ guêre.
I l’ avin’të tèrtoutes, sans tèrtoutes é mori.
N’ d’ avwat gneu un, pâr là, pâr chi,
Qui n’ cachwat à rtëni chô qui d’morwat dë s’ vîe;
D’ minjeu, n’ avin’të pus l’ anvîe.
Ni leû, ni rnârd pou aguigneu
Ène pëtite biète à dèvoreu.
Pus d’ amoûr à lès tourtërèles ;
Èt sans amoûr, gneu d’ bones nouvèles.
Amisses a dit l’ liyon, ô consèy qu’ il a t’nu,
Mi, i m’ san.ne quë l’ cièl a volu
Pou nos pècheus ène parèy plôke.
Quë l’ pus coupâbe dë nos ajeus
Sunche sacrifieu pa d’vant l’ colére du grand Bon Djeu;
Pitète quë linssi l’ môrt voûra èrlëveu s’ fôke.
L’ istwâre nos a apris qu’ quand on vit dès téles cas
On fét dès sacrifices come cha.
N’ dalon’ gneu nos flateu, vèyon’ sans induljance
Chô qui n’ va gneu dés no consiance.
Quant à mi, vos saveuz qu’ j’ é in-n-apétit d’ sót,
J’ é minjeu in saquant bëdóts.
I n’ m’ avin’të fét nûle arnése.
Èt min.me qu’ i fôt bieu l’ dîre, cha m’a kè.u d’ minjeu
Eùl bèrjeu.
Jë m’ sacrifîrwa bieu, adon, s’ i fôt, mès j’ pésse
Qu’ i sârwat bon qu’ tout l’ monde f’siche eùs’ mèa coulpa
Pasquë, pou fét justisse, il eùt fôrt sou.étâbe
Qu’ on condan.niche eùl pus coupâbe.
" Sîre, " qu’ i dit l’ èrnârd, " vos ètes in trop bon rwa;
Ète rè.ûs èt trop bon, vos l’ poveuz, à vo-n-n’ ése;
Èh bë ! Minjeu bëdóts, racaye, sotès èspéces
C’eùt-i pècheu ? Non, non ! Vos luns aveuz, Sègneûr,
Lès croquant, fé bran.mét d’ oneûr;
Èt quant ô bèrjeu, on peut dîre
Qu’ il avwat mèriteu sès môs,
Vu qu’ il ètwat dès jés qui sav’të toudis quô
Fé à nous lès biètes pour nos nwîre. "
L’ èrnârd a dit linssi. Èt lès ôtes d’ aplôdi.
On n’ onzwat gneu aparfondi
Du tîgue, dë l’ ours, ni co dès ôtes michantes fûrîes
Lès pus monvésès barbarîes.
Tous lès grands cachiveûs, èt jusqu’ ôs pus coquins,
À étène chaque eùs’ toûr, ètin’të dès m’ptits sints.
Eùl bôdeut dit, à s’ toûr : " I m’ san.ne quë j’ é mémwâre
Qu’ dés n’ patûre dë mwanes, é passant,
l’ apétit, l’ ocâsion, l’ yèrbë tére i fôt crwâre,
Èt probâbe eùl djâle eùm’ poussant,
J’ é tondu d’ eùç’ preu-là ôssi larguë quë m’ langue.
J’ n’ avwa gneu l’ pèrmission, pwisqu’ i fôt dîre franc mót. "
Du cóp tèrtoutes ont dit haro su l’ bouricót.
In leû, n’ mîlète instrwit a prouveu pa s’ n’ arangue
Qu’ i folwat fé mori ç’ bougrë-là d’ malotru,
Li, l’ galeûs qu’ ç’ ètwat d’ li quë tout l’ mô ètwat v’nu.
Eùs’ babiole a èteu jujée come cas pèdâbe.
Minjeu d’ yèrbë dès ôtes ! Qué crime abominâbe !
I n’ avwat foc’ quë l’ môrt capâbe
D’ èfaceu ène téle fôte èt i s’ a fé avwâr.
D’ apreus chô qu’ vos sâreuz à l’ tchète ou misèrâbe,
Lès jujméts dès pwissants vos rèdront blanc ou nwâr


Note : Non évalué [ Evaluer | Commentaires : 0 [ Poster un commentaire ]